16 ліпеня, Мінск /Кар. БЕЛТА/. Першы энергаблок БелАЭС будзе ўключаны пасля дыягностыкі сістэм і вузлоў турбагенератара. Аб гэтым паведаміў сёння журналістам міністр энергетыкі Віктар Каранкевіч, перадае карэспандэнт БЕЛТА.

12 ліпеня на першым энергаблоку БелАЭС спрацавала аўтаматычная абарона генератара. Турбагенератар быў адключаны ад сеткі. У адпаведнасці з планавым і праектным алгарытмам магутнасць рэактарнай устаноўкі была зніжана да мінімальна кантралюемага ўзроўню – да 1 працэнта. Электразабеспячэнне спажыўцоў у момант адключэння не парушалася.

“З улікам таго, што абсталяванне турбагенератара працавала пры тэмпературы каля плюс 300 градусаў, неабходны некаторы час для яго расхалоджвання, каб спецыялісты маглі пачаць высвятленне прычын спрацоўвання абароны генератара і іх устараненне”, – растлумачыў Віктар Каранкевіч.

Будзе праведзена дэталёвая дыягностыка ўсіх тэхналагічных сістэм і вузлоў турбагенератара. “Гэтыя работы будуць выконвацца паэтапна. Пасля іх завяршэння блок будзе зноў уключаны ў работу”, – дадаў міністр

14 ліпеня, Віцебск /Кар. БЕЛТА/. Сёння пачынаюцца першыя мерапрыемствы XXX Міжнароднага фестывалю мастацтваў “Славянскі базар у Віцебску”, паведамляе карэспандэнт БЕЛТА.

Беларускі тэатр “Лялька” восьмы раз прадставіць “Лялечны квартал”, які карыстаецца папулярнасцю. Творчыя калектывы з Беларусі і Расіі на працягу пяці дзён пакажуць спектаклі для дзяцей і дарослых. Першымі на сцэне 14 ліпеня выступяць гаспадары пляцоўкі з пастаноўкай “Насарог і Жырафа”.

Падрыхтавалі на сёння і нядрэнную выставачную праграму. У абласным краязнаўчым музеі прэзентуюць XI Нацыянальную філатэлістычную выставу “Белфіла-2021”. У экспазіцыі прадстаўлена 80 калекцый з Азербайджана, Арменіі, Беларусі, Ізраіля, Латвіі, Казахстана, Малдовы, Польшчы, Расіі, Украіны і Чэхіі. У канцэртнай зале “Віцебск” публіку чакаюць дзве выставы – жывапісу ад галерэі “АртХаос”, а таксама 750 фатаграфій, якія расказваюць аб розных кутках Расіі.

У дадатак да культурнай праграмы ў цэнтры сучаснага мастацтва прадставяць праект “Вясёлы Пушкін”. Гэта вынік шматгадовага супрацоўніцтва музея-запаведніка А.С. Пушкіна “Міхайлаўскае” і мастака Ігара Шаймарданава. Паводле задумы аўтара, выстава ўяўляе сабой “нешта накшталт маленькай выдуманай навелкі з жыцця Пушкіна або добрага анекдота”. Гэта прыдуманыя, выдуманыя або амаль праўдзівыя гісторыі з дзвюх зім і двух лет, праведзеных пісьменнікам у міхайлаўскай ссылцы, калі ён наведваў Трыгорскае, Бугроўскі млын і Святагорскі кірмаш.

Важнейшым мерапрыемствам першага дня “Славянскага базару” стане адкрыццё на будынку цэнтра культуры “Віцебск” памятнай дошкі заснавальніку фестывалю Радзівону Басу. Менавіта дзякуючы яму пра творчы форум даведаліся далёка за межамі Беларусі і ён стаў брэндам краіны.

Канцэртная праграма музычнага фестывалю пачнецца з выступлення “Хору Турэцкага”. Крыху пазней у Летнім амфітэатры пройдзе сімфанічная рок-феерыя “Уверцюра да фестывалю. Агонь і лёд”. Арганізатары абяцаюць эфектнае лядовае шоу ў гарачы ліпень. У 22.00 на пл.Перамогі з канцэртам-віншаваннем напярэдадні свайго дня нараджэння выступіць Рыгор Лепс. Уваход свабодны. Фінальным акордам першага дня “Славянскага базару” стане цырымонія падняцця сцяга форуму.

XXX Міжнародны фестываль мастацтваў “Славянскі базар у Віцебску” пройдзе з 15 па 18 ліпеня. Дадатковыя мерапрыемствы запланаваны на 14 і 19 ліпеня. Урачыстая цырымонія адкрыцця фестывалю адбудзецца 15 ліпеня на галоўнай сцэне. У час гала-канцэрта ўручаць спецыяльную ўзнагароду Прэзідэнта “Праз мастацтва – да міру і ўзаемаразумення”. Закрыюць фестываль гала-канцэртам з узнагароджаннем пераможцаў конкурсаў 18 ліпеня. Журы дарослага конкурсу ўзначаліць народны артыст Беларусі Анатоль Ярмоленка, дзіцячага – спявак Піліп Жмахер (Сербія). На форуме чакаюць прадстаўнікоў 33 краін, у тым ліку каля 5 тыс. артыстаў.-

12 ліпеня, Мінск /Кар. БЕЛТА/. Больш за 5 тыс. работнікаў прадпрыемстваў усіх рэгіёнаў краіны і сфер эканомікі выказаліся супраць санкцый. Аб гэтым БЕЛТА паведамілі ў прэс-службе Федэрацыі прафсаюзаў Беларусі.

“Людзям відавочна, што санкцыі ЕС і ЗША ў першую чаргу ўдараць па заработках, пенсіях, дапамогах. Такія дыскрымінацыйныя меры абсалютна незаконныя і парушаюць адно з асноўных правоў чалавека – права на працу. Беларусы гатовы абараняць такое права. Аб гэтым яны гавораць з сябрамі, у працоўных калектывах, сем’ях, выказваюць сваю пазіцыю ў сацыяльных сетках. Пляцоўкай, якая аб’ядноўвае тых, хто стаміўся маўчаць і гатовы адстойваць сваю пазіцыю, стала Федэрацыя прафсаюзаў. На інтэрнэт-партале нацыянальнага прафцэнтра сабраны тысячы меркаванняў людзей аб санкцыйнай палітыцы калектыўнага Захаду. Больш за 5 тыс. меркаванняў людзей аб’яднаны ў больш чым 30-гадзінны відэаролік, накіраваны сёння палітыкам краін Еўрасаюза”, – расказалі ў ФПБ.

“Я мама і хачу, каб у мяне была работа, каб я магла забяспечваць сваіх дзяцей, а дзеці жылі ў спакойнай краіне”, “Нам санкцыі не патрэбны!”, “Заклікаем займацца сваімі праблемамі і не ўмешвацца ў справы нашай краіны”, “Я падтрымліваю тысячы маіх калег, суайчыннікаў. Хачу паглядзець у вочы тым, хто заклікае з-за мяжы да санкцый, і задаць пытанне, як яны будуць глядзець у вочы сваім суайчыннікам, якія могуць застацца без работы, дзецям, якія могуць страціць будучыню”, “Пакіньце нас у спакоі! Дайце магчымасць спакойна працаваць!” – усё гэта словы простых людзей. Прамысловасць, энергетыка, хімічная галіна, адукацыя, ахова здароўя, сацыяльная і жыллёва-камунальная сферы, сельская і лясная гаспадарка, сувязь, будаўніцтва, гандаль, транспарт салідарна выступаюць супраць незаконных абмежавальных мер, якія прымяняюцца да нашай краіны.

“Гэта тая праўда, якую заходнія палітыкі сёння наўмысна ігнаруюць і скажаюць. Гэта тое, аб чым яны стараюцца не гаварыць. Яны сёння з высокіх трыбун заяўляюць, што нібы самі беларусы выступаюць за ўвядзенне санкцый, нібы ўсё гэта робіцца ў інтарэсах беларускага народа. Гэта відэа – дакладны і зразумелы адказ на такую хлусню, – падкрэслілі ў Федэрацыі прафсаюзаў. – Відавочна, што заходнія чыноўнікі не збіраюцца лічыцца з меркаваннем людзей. У лютым Федэрацыя прафсаюзаў накіравала ў іх адрас больш за 1,130 млн подпісаў рабочых супраць санкцый. Але і сёння зразумелага адказу на гэты салідарны і калектыўны запыт людзей няма. Цяпер еўрачыноўнікі ў сваіх беззаконных дзеяннях па-ранейшаму прыкрываюцца людзьмі – нібы разбурэнне нашай эканомікі ў іх інтарэсах. Але яны павінны ўбачыць праўду, якая застанецца ў гісторыі і будзе сведчаннем іх незаконнай і крывадушнай палітыкі”

13 ліпеня, Мінск /Кар. БЕЛТА/. Дзяржаўтаінспекцыя рэкамендавала вадзіцелям быць больш уважлівымі і асцярожнымі ў гарачае надвор’е. Аб гэтым БЕЛТА паведаміла дзяржаўтаінспектар АДАІ Партызанскага РУУС Мінска Ганна Ціхановіч.

“Ператамленне за рулём – натуральная рэакцыя арганізма на доўгае кіраванне аўтамабілем, звязанае са значнай нервовай нагрузкай. Небяспекі можна чакаць як ад іншых вадзіцеляў, якія заснулі за рулём і страцілі кіраванне, так і ад самога сябе, калі не адпачыць перад паездкай і некалькі гадзін запар весці аўтамабіль, – расказалі ў АДАІ. – Ператамленне суправаджаецца дрэнным самаадчуваннем, прытупленнем увагі, зніжэннем канцэнтрацыі, хуткай стамляльнасцю і нават бяссонніцай. Небяспека ДТЗ рэзка ўзрастае пасля 8-10 гадзін бесперапыннага ваджэння. Многія вадзіцелі пачынаюць адчуваць стомленасць ужо праз 2-3 гадзіны знаходжання за рулём, і, як правіла, перад паездкай яны не адпачываюць”.

Як адзначылі ў Дзяржаўтаінспекцыі, адна гадзіна ваджэння ва ўмовах інтэнсіўнага руху прыраўноўваецца да шасці гадзін дзейнасці чалавека, занятага цяжкай фізічнай працай. Пры кіраванні аўтамабілем на працягу гадзіны са скорасцю 100 км/гадз вадзіцель стамляецца гэтак жа, як людзі пасля чатырох гадзін цяжкай разумовай працы. Акрамя таго, на самаадчуванне ўплывае дрэннае асвятленне дарогі ноччу, неспрыяльныя ўмовы надвор’я, шум і вібрацыі ў кабіне, наступствы ўжывання алкаголю і лякарстваў. Адсюль узнікае няўважлівасць, неасцярожнасць, рассеянасць, марудлівасць. Усё гэта ўплывае на бяспеку дарожнага руху: у вадзіцеля адзначаецца запозненая рэакцыя на дарожную абстаноўку, знакі, сігналы святлафора, ён з цяжкасцю вытрымлівае скорасны рэжым і прамалінейнасць руху.

Асаблівую небяспеку ўяўляюць начныя рэйсы для вадзіцеляў старэйшых за 55 гадоў. “Ноччу шафёры гэтай узроставай групы робяць у два разы больш аварый, чым днём. Справа ў тым, што з узростам, нягледзячы на вялікі вадзіцельскі вопыт, пагаршаюцца псіхічныя і фізіялагічныя функцыі, якія непасрэдна ўплываюць на бяспеку ваджэння. Пры працяглай яздзе ноччу стомленасць можа прывесці да галюцынацый. Напрыклад, па шляху можа здацца дом або звер, які пераходзіць дарогу, могуць проста ўзнікнуць туманныя плямы або прадметы нявызначанай формы. У такіх выпадках вадзіцель рэзка тармозіць або зварочвае ўбок, потым пераконваецца, што на самай справе на дарозе ніякай перашкоды няма”, – сказала Ганна Ціхановіч.

Адзіны сродак выратавання ад галюцынацый – адпачынак. Неабходна рабіць перапынкі, пры ўзнікненні стомленасці спыняцца і адпачываць. Важна ўсведамляць: лепш крыху пазней прыехаць у месца прызначэння, чым трапіць у ДТЗ з-за стомленасці або наогул заснуць за рулём”, – дадалі ў ведамстве.

8 ліпеня, Мінск /Кар. БЕЛТА/. Для шматдзетных сем’яў на 1 ліпеня 2021 года адкрыта 100 930 дэпазітных рахункаў “Сямейны капітал”, з якіх па праграме 2020-2024 гадоў – 18 518, паведамілі БЕЛТА ў Міністэрстве працы і сацыяльнай абароны.

Па праграме “Сямейны капітал” 2015-2019 гадоў для шматдзетных сем’яў адкрыта 82 412 дэпазітных рахункаў на суму $824,1 млн. Памер назначанай у мінулую пяцігодку сумы складаў $10 тыс. для шматдзетных сем’яў, у якіх трэцяе або наступнае дзіця нарадзілася (усыноўлена, удачарона) у перыяд з 1 студзеня 2015 года па 31 снежня 2019 года ўключна. Звярнуцца па назначэнне сямейнага капіталу можна было па 30 чэрвеня 2020 года ўключна – не пазней за шэсць месяцаў з дня нараджэння (усынаўлення, удачарэння) трэцяга дзіцяці або наступных дзяцей.

Па праграме 2020-2024 гадоў для шматдзетных сем’яў адкрыта 18 518 дэпазітных рахункаў на суму Br421,7 млн. У новай пяцігодцы сямейны капітал назначаецца шматдзетным сем’ям, у якіх трэцяе або наступнае дзіця нарадзілася (усыноўлена, удачарона) з 1 студзеня 2020 года па 31 снежня 2024 года ўключна. У 2020 годзе памер сямейнага капіталу складаў Br22,5 тыс., а з 1 студзеня 2021 года – Br23 737,5.

“На 1 ліпеня гэтага года на датэрміновае распараджэнне сродкамі сямейнага капіталу пададзена 38 532 заявы. З іх на паляпшэнне жыллёвых умоў – 34 391 (89 працэнтаў), на атрыманне адукацыі – 1779 (5 працэнтаў), на атрыманне медыцынскіх паслуг – 2362 (6 працэнтаў). Прынята 36 430 рашэнняў аб датэрміновым распараджэнні сродкамі сямейнага капіталу”, – адзначылі ў Мінпрацы.

Больш за ўсё рашэнняў аб размарозцы сямейнага капіталу прынята ў Брэсцкай вобласці – 7783, следам ідуць Мінская – 6117, Гомельская вобласць – 5847, Мінск – 5057, Гродзенская вобласць – 4253, Магілёўская – 3753. Менш за ўсё такіх рашэнняў прынята ў Віцебскай вобласці – 3620.-0-

Вечарам 6 ліпеня многія збяруцца ля вадаёмаў, каб адсвяткаваць самую таямнічую ноч у годзе — Купальскую. Абавязкова будуць гарэць вогнішчы, дзяўчаты сплятуць вянкі з цалебных зёлак і кветак. Іх пазней пусцяць па вадзе, варажуючы-загадваючы: ці выйдуць сёлета замуж, ці добрае сумеснае жыццё чакае будучую маладую сям’ю?

Раённае свята Купалле адбудзецца ў Новай Гуце на беразе ракі Сож, на якое ў 20 гадзін запрашаюць жыхароў і гасцей аграгарадку.

— Купалле ў нашым населеным пункце ўжо стала традыцыйным, — расказвае выконваючы абавязкі загадчыка Навагуцкага сельскага дома культуры Наталля Шатовіч. — І з кожным годам свята збірае ўсё больш удзельнікаў. Сёлета мы падрыхтавалі цікавую тэатралізацыю, а таксама вялікую канцэртную праграму. Прыходзьце: будзе весела і незабыўна!

Таямніцы Купалля можна будзе разгадаць таксама ў іншых населеных пунктах раёна: 6 ліпеня вясёлае свята змогуць наведаць жыхары вёсак Зябраўка і Маркавічы (пачатак у 20.00). У пятніцу, 9 ліпеня, работнікі культуры з Цярэшкавіч і Бабовіч прапануюць аднавяскоўцам адшукаць “кветку шчасця” і паглядзець тэатралізаванае прадстаўленне, а ў суботу, 10 ліпеня, Купалле адбудзецца на возеры Іпуць і ў аграгарадку Яроміна.

Як верылі нашы продкі, у Купальскую ноч жывёлы могуць размаўляць, расліны — хадзіць, а недзе ў гушчары лясной распускаецца папараць-кветка, якая валодае магічнымі здольнасцямі надзяляць кожнага, хто яе знойдзе. Да святкавання гэтай ночы рыхтаваліся людзі ўсіх узростаў: увечары дзяўчаты зёлкі ў полі збіралі, вянкі плялі, а потым на іх варажылі, па вадзе пушчалі. Лічылася, што толькі ў гэтую ноч можна ўбачыць, як русалкі на галінах дрэў калыхаюцца. Вось толькі сустрэча з імі для мужчын небяспечная: русалкі могуць заваражыць любога з іх і зацягнуць на глыбіню.

Існаваў яшчэ адзін купальскі звычай: 6 ліпеня, калі царква адзначала памяць святой Агрыпіны, якую ў народзе называлі Аграфена, усе імкнуліся нарыхтаваць венікі для лазні, а бліжэй да вечара мыліся. Таму гэты дзень у народзе часцей называлі днём Аграфены Купальніцы. А лагічным яго працягам стала ўмыванне вадою на світанні 7 ліпеня, альбо “купанне” у ранішняй расе.

І толькі на Купалле раскладваюць вогнішча, цераз якое ўсе перапрыгваюць. Бо ад гэтага дзеяння, як лічылі нашы продкі, “усе балячкі ў агонь сы-ходзяць, і чалавек здаравей становіцца”. Так гэта ці не, аднак пасля скачку многія і сапраўды адчуваюць прыліў сіл. Альбо гэта атмасфера свята так дзейнічае, усё ж такі адчуваецца ўздзеянне таямнічай ночкі Купальскай?

Ірына ГРАМЫКА. Фота Марыны ВАСІЛЬЕВАЙ.

Адкрыццё трэцяга працоўнага семестра адбылося 4 чэрвеня ў сталіцы: Мінская гарадская арганізацыя БРСМ у парку Перамогі ўручыла працоўныя пуцёўкі ўдзельнікам студэнцкіх атрадаў горада. У старце працоўнага семестра былі задзейнічаны 2 тыс. удзельнікаў. Сімвалічныя працоўныя пуцёўкі студатрадаўцам перадалі старшыня Мінскага гарадскога выканаўчага камітэта Уладзімір Кухараў, першы сакратар Цэнтральнага камітэта БРСМ Дзмітрый Варанюк і першы сакратар Мінскай гарадской арганізацыі БРСМ Раман Бандарук.

БЕЛТА