Орша будзе культурнай сталіцай Беларусі ў 2022 годзе

Фота з архіва

Культурнай сталіцай 2022 года выбрана Орша, паведамілі БЕЛТА ў Міністэрстве культуры.

“На пасяджэнні калегіі Міністэрства культуры, у ходзе якога разглядалася пытанне аб наданні статусу “Культурная сталіца года” ў 2022 годзе, былі разгледжаны пададзеныя заяўкі і прэзентацыйныя матэрыялы ад шасці гарадоў розных абласцей Беларусі. Уладальнікам гэтага статусу ў 2022 годзе, па рашэнні членаў калегіі, стане горад Орша”, – расказалі ў ведамстве.

Рэспубліканская акцыя “Культурная сталіца года” праводзіцца з 2010 года. Яе мэтай з’яўляецца прэзентацыя культурнай самабытнасці гарадоў і рэгіёнаў Беларусі, стварэнне праз сферу культуры ўмоў для іх сацыяльна-эканамічнага развіцця.

За час правядзення акцыі статусам “Культурная сталіца года” валодалі гарады: Полацк (2010), Гомель (2011), Нясвіж (2012), Магілёў (2013), Гродна (2014), Брэст (2015), Маладзечна (2016), Бабруйск (2017), Наваполацк (2018), Пінск (2019), Ліда (2020), Барысаў (2021).

БЕЛТА

Адраджэнне нацысцкай ідэалогіі ў Беларусі недапушчальна – Рачкоў

Сяргей Рачкоў

Адраджэнне нацысцкай ідэалогіі ў Беларусі недапушчальна, заявіў старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рачкоў у час пасяджэння праекта БЕЛТА “Экспертнае асяроддзе” на тэму “Законы аб недапушчэнні рэабілітацыі нацызму і процідзеянні экстрэмізму”.

“Актуальнасць законаў, якія прыняты, відавочная. Падзеі 2020 года, спробы выкарыстоўваць ідэі нацызму дэструктыўнымі сіламі для расхіствання сітуацыі ў нашай краіне былі відавочнымі. На жаль, мы павінны канстатаваць, што ў нашай рэспубліцы, якая больш за ўсіх пацярпела ў гады Вялікай Айчыннай вайны, страціўшы 3 млн чалавек, адбываюцца такія падзеі”, – сказаў Сяргей Рачкоў.

Паводле яго слоў, ніхто нават не мог падумаць, што мы некалі падыдзем да пытання аб заканадаўчым рэгуляванні праблемы недапушчэння рэабілітацыі нацызму, гераізацыі нацысцкіх злачынцаў і іх памагатых. “Але тым не менш у парламенце Беларусі мы прынялі рашэнне, што неабходна падрыхтаваць такі закон, – адзначыў сенатар. – Хачу адзначыць, што былі дыскусіі, розныя меркаванні. І адно з меркаванняў было інтэграваць тэматыку недапушчэння рэабілітацыі нацызму ў закон аб процідзеянні экстрэмізму. Але большасць схілілася да таго, што мы павінны мець асобны закон, які дасць сур’ёзны сігнал грамадству аб тым, што ў Беларусі такая дзейнасць недапушчальная. Таму быў распрацаваны асобны закон”.

Закон аб рэабілітацыі нацызму распрацаваны з улікам норм мадэльнага закона Міжпарламенцкай асамблеі дзяржаў – удзельніц СНД “Аб недапушчальнасці дзеянняў па рэабілітацыі нацызму, гераізацыі нацысцкіх злачынцаў і іх памагатых”. “На этапе падрыхтоўкі закона мы прыйшлі да думкі, што ён у першую чаргу павінен мець такую ідэалагічную накіраванасць і садзейнічаць таму, каб у нашым грамадстве мы маглі дакладна вызначыцца, што адраджэнне нацысцкай ідэалогіі недапушчальна. У законе выразна сказана аб забароне на рэабілітацыю нацызму, гераізацыю нацысцкіх злачынцаў. І асабліва хацеў бы адзначыць, што мы дакладна акцэнтавалі таксама ўвагу на праблематыцы тых, хто ўдзельнічаў на баку акупантаў у гады Вялікай Айчыннай вайны, на калабарантах, на тых, хто ўдзельнічаў у генацыдзе беларускага народа”, – дадаў ён.

БЕЛТА

Медыкі аб вакцынацыі ад COVID-19: цікавасць высокая, асабліва ў пажылых

Масавую вакцынацыю супраць COVID-19 плануюць пачаць ужо ў гэтым месяцы. Калі вы яшчэ не запісаліся на прышчэпку, расказваем, як гэта можна зрабіць. Дарэчы, нават выходзіць з дома не давядзецца.

Бярэзінская ЦРБ: цікавасць да вакцыны высокая, асабліва ў пажылых

Пра тое, што ў Бярэзінскай ЦРБ можна запісацца на прышчэпку супраць COVID-19, напісана на сайце бальніцы. Пра гэта ж расказваюць пацыентам у час прыёму тэрапеўты, урачы агульнай практыкі і вузкія спецыялісты. У мясцовай газеце раз-пораз выходзяць падрыхтаваныя медыкамі матэрыялы на тэму вакцынацыі. Інфармацыі для мясцовых жыхароў, як лічыць намеснік галоўнага ўрача па медыцынскім абслугоўванні Таццяна Ермакова, дастаткова. Акрамя таго, медработнікі заўсёды гатовы пракансультаваць і адказаць на любыя пытанні.

– Інфармуем насельніцтва вельмі актыўна. Таму, напэўна, і высокая зацікаўленасць з боку людзей, асабліва пажылых. Сёння кожнае структурнае падраздзяленне ЦРБ вядзе папярэдні запіс жадаючых зрабіць прышчэпку: працуе прамая лінія, можна звярнуцца ў фельчарска-акушэрскія пункты, участковыя бальніцы, амбулаторыі па месцы жыхарства. Пацыентам расказваюць пра вакцынацыю, падрыхтоўку да яе і магчымыя рэакцыі арганізма на прышчэпку, – тлумачыць медык. – Так, у перапынку паміж уводам двух кампанентаў прэпарату ад каранавіруса, які складае 21 дзень, асаблівых рэкамендацый няма. Адзінае, лепш выключыць у першыя тры дні алкагольныя напіткі і абмежаваць фізічныя нагрузкі. Акрамя таго, вельмі важна выконваць ахавальны рэжым, каб не захварэць у міжвакцынальны перыяд.

Паводле слоў Таццяны Ермаковай, цяпер згодна з нацыянальным планам у раёне праходзяць першы і другі этапы вакцынацыі. У першую чаргу прышчапляюцца медработнікі, сацработнікі, настаўнікі. Атрыманыя раней 150 доз вакцыны амаль зрасходаваны.

Валожынская ЦРБ: гаворым адкрыта пра пабочныя рэакцыі

У Валожынскай ЦРБ таксама запісацца на вакцынацыю можна самымі рознымі спосабамі: па тэлефоне, на сайце медустановы, у рэгістратуры або асабіста на прыёме ва ўрача.

– Варыянтаў на самай справе шмат, і кожны знаходзіць для сябе падыходзячы. З кожным днём усё больш жадаючых зрабіць прышчэпку. Адназначна ў гэтай сітуацыі добра спрацоўвае і сарафаннае радыё, – заўважае галоўны ўрач Валожынскай ЦРБ Павел Ганчар. – Акрамя таго, нашы спецыялісты сустракаюцца з працоўнымі калектывамі, расказваюць, што такое прышчэпка ад каранавіруса, навошта яе трэба рабіць, як яна дзейнічае. Адкрыта гаворым пра магчымыя пабочныя рэакцыі, бо гэта пытанне людзей хвалюе ў першую чаргу.

Павел Алегавіч не ўтойвае, што сярод пацыентаў ёсць і такія, хто да вакцынацыі ставіцца з недаверам. Праўда, іх становіцца ўсё менш.

– Людзі 45-50 гадоў разважаюць: навошта адмаўляцца ад прышчэпкі, калі можна з яе дапамогай уберагчы сябе ад цяжкага цячэння хваробы. Тыя, каму за 60, ведаюць, што знаходзяцца ў групе рызыкі, асабліва маючыя хранічныя захворванні. Хтосьці вырашае заняць пазіцыю чакання: сусед зрабіў, пагляджу, што будзе, і потым вызначуся, – гаворыць галоўны ўрач. – Да таго ж няма забароны рабіць прышчэпку цяпер тым, хто не працуе медыкам або настаўнікам. Да нас ужо звярталіся людзі, якія хочуць перад ад’ездам у іншую краіну прайсці вакцынацыю. Нікому не адмаўляем!

БЕЛТА

“Яромушка” — ансамбль “узорны”: рэспубліканская атэстацыйная камісія лічыць яго вартым прысваення гэтага наймення

Аўтэнтычнасць песеннай і танцавальнай культуры Палесся, вывучэнне традыцый і абрадаў — такі напрамак абрала кіраўнік фальклорнага ансамбля “Яромушка” Яромінскай дзіцячай школы мастацтваў Кацярына Магонава. А нядаўна творчы калектыў пацвердзіў сваё выканаўчае мастэрства і глыбіню вывучэння матэрыяла — рэспубліканская атэстацыйная камісія лічыць ансамбль вартым прысваення наймення “узорны аматарскі калектыў”.

Дарэчы, фальклорны гурт створаны тры з паловай гады назад — ужо пяты па ліку калектыў ва ўстанове адукацыі. “Яромушкі” з захапленнем вывучаюць народную творчасць роднага краю. Найбольшую цікавасць у іх выклікае асаблівая песенная традыцыя, якая дазваляе адным голасам, без музычнага суправаджэння, ствараць вакальныя “малюнкі”.

— Мне вельмі падабаецца вывучаць і выконваць складаныя творы, так званыя антыфоны, калі дзве і болей песні як бы “накладаюцца” адна на адну, — расказала салістка ансамбля Маша Каешка.

Яе сяброўцы Машы Дзегцяровай і адзінаму хлапчуку-вакалісту Паўлу Ганчарову таксама падабаюцца цікавыя “малюнкі” народных песень. Як зазначаюць юныя спевакі, фальклорныя творы — багацейшая скарбніца, якая раскрывае свае таямніцы толькі ўлюбёным у народныя спевы творцам.

— Вывучаць старажытныя песні, іх мелодыі і гучанне — гэта модна і цікава, — зазначае хлапчук. — Тым больш, што яны прысвечаны розным святам альбо традыцыям. Падчас выступленняў мы выконваем творы як сольна, так і ў складзе хора.

У фальклорнага калектыва — значны рэпертуар песень рознай тэматыкі і жанравай разнастайнасці: антыфоны, лічылкі, прыпеўкі пад танец, веснавыя заклічкі, купальскія песні, карагодныя гульні, пазаабрадавыя песні. Гэтыя вакальныя скарбы юныя “яромушкі” выконваюць пад музыку і а капэла.

Дарэчы, фальклорны гурт, які наведваюць 16 удзельнікаў ва ўзросце ад 8 да 14 гадоў, складаецца з двух груп — вакальнай і танцавальнай. Пад кіраўніцтвам харэографа Валянціны Шэлюх дзеці вывучылі такія старажытныя танцы як “Лявоніха”, “Полька з падкідэнсам”, “Полька з чыгунамі” і нават танцавальную гульню “Юрачка”. Таму не дзіўна, што кожнае выступленне “яромушак” — гэта не проста цікавыя і прыгожыя спевы, але і адметныя танцы.

Адметнасцю ансамбля “Яромушка” з’яўляецца і тое, што амаль усе вакалісты фальклорнага гурта граюць на старажытных народных музычных інструментах. Канцэртмайстар Іван Кацэвіч вучыць юных музыкаў граць на дудачцы, гармоніку, лыжках, скрыпцы і іншых інструментах, таму выступленне салістаў часта суправаджаецца арыгінальнай аранжыроўкай у іх асабістым выкананні.

— Каб найбольш поўна прадэманстраваць тэматычную і жанравую разнастайнасць нашага рэпертуару, канцэртную праграму, якую прадставілі кампетэнтным знаўцам музыкі, спеваў і народнай творчасці, назвалі “Калаварот года”, — адзначыла Кацярына Магонава. — А каб было яшчэ цікавей, зрабілі яе ў выглядзе тэатралізаванай пастаноўкі.

Дарэчы, фальклорны гурт “Яромушка” у мінулым годзе з поспехам выступіў на II Адкрытым міжнародным фестывалі-конкурсе “Прамень” у Гомелі. Юныя вакалісты выканалі вельмі складаны масленічны антыфон, які склалі дзве песні “А на гарэ” і “А ў нас сёння Масленіца”. Дадому юныя аматары народнай творчасці вярнуліся з Дыпломам I ступені ў намінацыі “Самабытны фальклор. Вакальнае мастацтва. Ансамбль”.

Гурт “Яромушка” дбайна захоўвае народна-песенныя традыцыі Гомельскага раёна, традыцыйныя святы і абрады. Дзецям настолькі цікава займацца народнай творчасцю, што яны дабіваюцца значных поспехаў у асваенні новых музычных твораў.

https://sozhnews.by

Міхась Башлакоў: “Без памяці няма грамадства, без мовы, веры, без душы…”

Лёгкасць, лірызм, шчырасць, сумленне, спагада, глыбіня — паэзія Міхася Башлакова шматгранная, і кожны верш мае асаблівую танальнасць і моцна кранае за душу. Ураджэнца Гомельскага раёна Міхася Башлакова называюць яшчэ песняром Гомельшчыны, бо ў сваіх творах паэт апісвае веліч малой радзімы праз простыя рэчы. У красавіку наш знакаміты земляк адзначыў 70-гадовы юбілей.

Міхась Башлакоў усё жыццё прысвяціў працы з мастацкім словам: некалькі гадоў пасля заканчэння Гомельскага дзяржаўнага ўніверсітэта імя Францыска Скарыны працаваў настаўнікам беларускай мовы і літаратуры. Падчас летніх канікул ён адкрыў для сябе Палессе, якое ў пэўнай ступені стала ягоным “творчым кабінетам”: тут напісана нямала твораў, пры-свечаных гэтаму дзівоснаму краю, у тым ліку і паэма «Цар-дуб»…

Дэбют Міхася Башлакова адбыўся ў 1968 годзе публікацыяй на старонках газеты “Маяк” верша “Раўчук”. Тады Міхась вучыўся ў 10 класе Грабаўскай сярэдняй школы. Праз дваццаць гадоў пасля першай публікацыі яго прынялі ў склад Саюза пісьменнікаў СССР. Дарэчы, некаторы час Міхась Захаравіч узначальваў літаратурнае аб’яднанне “Пралеска”, якое дзейнічала пры рэдакцыі “Маяка”. Таксама ён быў у ліку калектыву літаратараў і вучоных, хто займаўся падрыхтоўкай да выдання 145-томнай гісторыка-дакументальнай хронікі “Памяць”.

Наш славуты зямляк — аўтар зборнікаў “Касавіца”, “Начны паром”, “Дні мае залатыя”, “Як слёзы горкія Айчыны…”, “Матчыны грыбы перабіраю”, “Пяро зязюлі падніму”, “Палын”, “Світальныя коні” і іншых. На Міжнародным кніжным кірмашы ў Франкфурце-на-Майне ў 2005 годзе зборнік “Нетры” увайшоў у лік ста лепшых кніг свету, а праз год у Бельгіі гэты зборнік, а таксама кніга “Палын. Чарнобыль”, выдадзеныя ў сааўтарстве з графікам Міхаілам Барздыкам, адзначаны залатым медалём Міжнароднага конкурсу выяўленчага мастацтва. Міхась Башлакоў — лаўрэат Дзяржаўнай прэміі Рэспублікі Беларусь і расійскай прэміі Баяна. А ў 2018 годзе наш зямляк быў узнагароджаны медалём Францыска Скарыны.

Творчае крэда пісьменнік акрэсліў у адным з вершаў: “Без памяці няма грамадства, без мовы, веры, без душы…”. Вершы Міхася Башлакова пранізаны пачуццём патрыятызму, бо паэт лічыць, што без любові да Бацькаўшчыны, гістарычнай памяці не можа быць чалавека годнага і шчырага. І заўсёды ў яго творах тэма малой радзімы гучала асабліва ярка і моцна: “Мой родны Гомельскі раён // Мае шляхі, мае крыніцы… // Тут меў я шчасце нарадзіцца. // Як песня дзіўная, як сон, // Мой родны Гомельскі раён…”

Міхась Башлакоў кожны раз, калі прыязджае на малую радзіму, наведвае родную школу ў Грабаўцы. Сустракаецца з настаўнікамі і вучнямі, чытае ім вершы — вядомыя і новыя творы.

Па прапанове дырэктара школы Таццяны Мацюшэнка ва ўстанове адукацыі нядаўна адбылося свята паэзіі, прысвечанае знакамітаму земляку. Тэматыка твораў, якія прачыталі са сцэны вучні, была разнастайнай, як і ўся творчасць паэта: побач з лірычнымі радкамі аб каханні гучала і грамадзянска-патрыятычная паэзія.

Вучаніца 9 класа Грабаўскага дзіцячага сада – сярэдняй школы Ганна Шарко адзначае:

— Мы ганарымся тым, што на старонках падручнікаў па беларускай літаратуры ёсць творы выпускніка нашай школы, таму з задавальненнем прынялі ўдзел у свяце паэзіі ў яго гонар.

https://sozhnews.by

Сёння ў Маркавічах і Гадзічаве правялі абрад “Сула”

Як і амаль стагоддзе назад, у панядзелак пасля Вялікадня ў Маркавічах і Гадзічаве правялі абрад Сула. Нягледзячы на тое, што яна была прызвана “абудзіць зямлю” і падрыхтаваць да засявання і будучага добрага ўраджаю, з цягам часу гэты язычаскі абрад супаў са святкаваннем Вялікадня. У 2019 годзе абрад быў прызнана гісторыка-культурнай каштоўнасцю Беларусі.

Так і павялося: у першы дзень пасля Уваскрэсення Хрыстова, пабываўшы на малебне ў храме, жыхары Гадзічава з песнямі і танцамі ішлі да Маркавіч. І ўжо тут, у полі ў канцы вёскі жанчыны і дзеўкі “заводзілі танка” — пачыналі вадзіць карагод, каб “усё ў нас радзіла, і каб маланка нас не біла!”.

Абрад Сула (дарэчы, гэтае слова азначае рух, плынь) меў сакральнае значэнне — карагод сімвалізаваў і сонца, і ў той жа час лічыўся абярэгам. А тры дзяўчынкі, якія абавязкова знаходзіліся ў цэнтры кола-карагода, і якіх потым жанчыны падымалі ўверх, — гэта пажаданне дзеткам расці здаровымі і дужымі, а таксама добрага ўраджаю.

Згодна з традыцыяй, адна з жыхарак Маркавіч з кулічом ці пасхай на тканым рушніку і такімі словамі сустракала гасцей: “Як прайшоў Хрыстос усе мукі, узялі Яго пад рукі. Яго маці стаяла і такія слава прамаўляла: “Сыне мой, як будзеш Ты васкрасаці, будуць цябе ангелы страчаць, са святым васкрасеннем паздраўляць! Хрыстос уваскрос!”. А жанчына з Гадзічава ёй адказвае: “Дай Бог і на той год даждаць светлага Хрыстова васкрасення ў шчасці і здароўі! Хрыстос уваскрос!” — і абедзьве хрыстосуюцца. Так было і сёлета.

Сёлета на Сулу ў Маркавічы прыехалі ўдзельнікі фальклорнага калектыву “Яромушкі” Яромінскай дзіцячай школы мастацтваў і фальклорны ансамбль “Спадчына” з Урыцкага, выступілі і школьнікі Маркавіцкай установы адукацыі. Каля дома культуры былі арганізаваны выставы дэкаратыўна-прыкладнога мастацтва, таксама ўсе жадаючыя наведалі майстар-клас па народна-побытавым танцам і ўпрыгажэнню вялікодных яек.

https://sozhnews.by

Пры распрацоўцы праграмы адраджэння чарнобыльскіх зямель першасная эканоміка – Даўгала

Ірына Даўгала. Фота з архіва

28 красавіка, Мінск /Кар. БЕЛТА/. Пры распрацоўцы праграмы адраджэння чарнобыльскіх зямель на першы план выходзіць эканоміка. Такое меркаванне член Пастаяннай камісіі па заканадаўстве Палаты прадстаўнікоў, дэпутат па Гомельскай-Савецкай акрузе нумар 34 Ірына Даўгала выказала газеце “СБ. Беларусь сегодня”, каменціруючы даручэнне Прэзідэнта аб падрыхтоўцы адпаведнага дакумента, паведамляе БЕЛТА.

“Незалежна ні ад чаго, першасна – гэта эканоміка: будуць рабочыя месцы, будзе вытворчасць – значыць, будуць заработная плата і ўмовы для жыцця”, – адзначыла парламентарый.

Паводле яе слоў, не менш важны аспект – экалогія і здароўе. “Людзі павінны ведаць, што яны жывуць няхай і не ў чыстай зоне, але бяспечнай. І гэта таксама ўплывае на стварэнне рабочых месцаў, – сказала Ірына Даўгала і падкрэсліла, што добрыя ўмовы ў забруджаных раёнах створаны ўжо цяпер. – Паглядзіце, наколькі чыстыя там вуліцы. У населеныя пункты ўкладвалася душа. Рэканструявалі не толькі самі раённыя цэнтры, але і аграгарадкі і нават маленькія вёскі. Стараліся рабіць так, каб жыць людзям было прыемна і камфортна”.

Як паведамлялася раней, распрацаваць праграму адраджэння чарнобыльскіх зямель Аляксандр Лукашэнка даручыў 26 красавіка ў час нарады ў Брагіне.

“Гэта праграма павінна быць праграмай адраджэння зямель, мэтай якой павінна быць аднаўленне таго ўзроўню, як было да Чарнобыля. З некаторымі асаблівасцямі”, – заявіў Аляксандр Лукашэнка. Паводле яго слоў, не варта імкнуцца аднавіць невялікія вёскі, і гэта не трэба рабіць: “Нам трэба вызначыцца, як мы гаварылі ў Нароўлі, дзе будуць жыць людзі. А гэта раённыя цэнтры (яны ёсць) і аграгарадкі, якія ў прынцыпе існуюць. Трэба сканцэнтравацца на гэтых аграгарадках”.

Адна з перспектыўных сфер для развіцця гэтых тэрыторый – лесанарыхтоўка і дрэваапрацоўка. “Але першачарговым чынам нам трэба высадзіць лес на свабодных плошчах, а іх нямала. Шмат такіх участкаў”, – адзначыў кіраўнік дзяржавы.

Зразумела, будуць удзяляць увагу і сельскай гаспадарцы, якая займае значнае месца ў эканоміцы гэтых раёнаў.

“Поўдзень нашай краіны – мы павінны падумаць, што будзем рабіць. Аж да таго, што, як мы некалі планавалі, з Жыткавіч чыгунку кінуць да Ельска, закальцаваць. Цяпер палічым, калі яна хаця б за 10-12 гадоў акупіцца, гэта трэба рабіць, каб уключыць гэты рэгіён. Ну і іншыя дарогі трэба падцягваць. Словам, трэба аднаўляць раён, вызначыцца, дзе будуць жыць людзі. Мы павінны разумець, якія прадпрыемствы там пабудаваць, якія будуць рабочыя месцы”, – сказаў Аляксандр Лукашэнка.

Стаіць задача выпрацаваць адпаведную праграму да верасня.

БЕЛТА

Саўмін скарэкціраваў парадак павышэння зарплаты ў залежнасці ад росту прадукцыйнасці працы

Фота з архіва

Урад унёс карэктывы ў парадак павышэння памераў аплаты працы работнікаў у залежнасці ад росту прадукцыйнасці працы. Гэта прадугледжана пастановай Савета Міністраў ад 23 красавіка 2021 года нумар 243, паведамілі БЕЛТА ў прэс-службе ўрада.

Згодна з дакументам, кіраўніку дзяржаўнай арганізацыі прадастаўлена права змяняць памеры аплаты працы і структуру зарплаты работнікам у межах агульнага памеру аплаты, устаноўленага лакальнымі прававымі актамі і працоўнымі дагаворамі. “Гэта дасць магчымасць выконваць адначасовы перагляд памераў тарыфных ставак (тарыфных акладаў) работнікаў пры індэксацыі заработнай платы, праводзіць удасканаленне структуры зарплаты пры ўмове захавання агульнага памеру аплаты працы, устаноўленага лакальнымі прававымі актамі і працоўнымі дагаворамі”, – адзначылі ў прэс-службе.

Акрамя таго, кіраўнік дзяржарганізацыі мае права павышаць памеры аплаты працы работнікаў адасобленага падраздзялення, што мае асобны баланс, пры ўмове суадносін росту прадукцыйнасці працы і намінальнай налічанай сярэднямесячнай заработнай платы больш за 1,0 у гэтым адасобленым падраздзяленні. Пры разліку прадукцыйнасці працы ў дзяржарганізацыі прымяняецца выручка ад рэалізацыі прадукцыі, тавараў, (работ, паслуг) або дабаўленая вартасць на аднаго сярэдняспісачнага работніка. Выбар паказчыка разліку выконваецца на каляндарны год па ўзгадненні з вышэйшым органам (арганізацыяй).

Таксама прадугледжана магчымасць аднаразова на працягу каляндарнага года змяніць паказчык разліку па ўзгадненні з вышэйшым органам (арганізацыяй).

Раней змяненне паказчыка вызначэння прадукцыйнасці працы на працягу каляндарнага года дапускалася толькі ў выпадку замены паказчыка выручкі ад рэалізацыі прадукцыі, тавараў, работ, паслуг на аднаго сярэдняспісачнага работніка на паказчык дабаўленай вартасці на аднаго сярэдняспісачнага работніка на гэты ж каляндарны год.

“Прымяненне норм гэтай пастановы дасць магчымасць больш гібка прымаць рашэнні аб павышэнні памераў аплаты працы работнікаў у дзяржарганізацыях і іх адасобленых падраздзяленнях, што маюць асобны баланс, а таксама захаваць матывацыю работнікаў у забеспячэнні росту прадукцыйнасці”, – падкрэслілі ў прэс-службе.

Дакумент уступае ў сілу з 1 мая 2021 года.

БЕЛТА

Дождж з мокрым снегам чакаюцца па паўночным усходзе Беларусі 28 красавіка

Фота з архіва

Дождж з мокрым снегам чакаюцца па паўночным усходзе Беларусі 28 красавіка, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

У сераду будзе воблачна з праясненнямі. Месцамі па паўночна-ўсходняй частцы краіны пройдуць невялікія кароткачасовыя ападкі (дождж, уначы з мокрым снегам). Ноччу і раніцай у асобных раёнах чакаецца слабы туман. Вецер прагназуецца няўстойлівы 3-8 м/с.

Тэмпература паветра ўначы складзе ад мінус 4 да плюс 2. Удзень будзе 7-13 градусаў цяпла, у паўднёва-заходніх раёнах – да плюс 15.

БЕЛТА

У Беларусі плануецца павялічваць будаўніцтва арэнднага жылля за кошт прыцягнення інвестараў

Фота з архіва

У Беларусі плануецца нарошчваць аб’ёмы будаўніцтва арэнднага жылля за кошт прыцягнення прыватных інвестараў. Аб гэтым паведамілі карэспандэнту БЕЛТА ў прэс-службе Міністэрства архітэктуры і будаўніцтва.

Цяпер вядзецца работа па актывізацыі будаўніцтва арэнднага жылля за кошт розных крыніц і прыцягненні прыватных забудоўшчыкаў. “Работа арганізавана ў двух напрамках. Гэта ўключэнне пустуючых арэндных жылых памяшканняў дзяржаўнага жылфонду і прыватнага жылля фізічных асоб, якія маюць свабодныя кватэры для перадачы ў арэнду па рыначным кошце, і нарошчванне аб’ёмаў будаўніцтва арэнднага жылля за кошт стварэння эканамічных умоў і стымулявання прыватных інвестараў на ажыццяўленне такога будаўніцтва. Забяспечвацца арэндным жыллём будуць перш за ўсё маючыя патрэбу ў паляпшэнні жыллёвых умоў з прадастаўленнем дзяржаўнай падтрымкі ў выглядзе субсідый на частковую кампенсацыю арэндных плацяжоў”, – растлумачылі ў прэс-службе.

Як адзначылі ў міністэрстве, каб прыцягнуць прыватных забудоўшчыкаў да будаўніцтва арэнднага жылля, плануецца прадастаўляць ім без аўкцыённых таргоў адразу два зямельныя ўчасткі для будаўніцтва арэнднага жылля і жылога дома на камерцыйных умовах. Пры гэтым зямельныя ўчасткі павінны быць перададзены без абцяжаранняў, гэта значыць без будынкаў пад знос. Будаўніцтва інжынерных сетак для арэнднага дома плануецца ажыццяўляць за кошт дзяржавы, а для камерцыйнага дома будзе кампенсацыя за кошт дзяржавы ў памеры 50 працэнтаў. “Магчыма, будуць прадастаўляцца падатковыя льготы, а менавіта, вызваленне ад падатку на прыбытак часткі валавога прыбытку, што накіроўваецца арганізацыяй на будаўніцтва або набыццё арэнднага жылля. Таксама абмяркоўваецца магчымасць прадастаўлення крэдытаў для будаўніцтва такіх дамоў з больш нізкай працэнтнай стаўкай у выпадку, калі большая частка сродкаў будзе самога забудоўшчыка”, – расказалі ў ведамстве.

У Мінбудархітэктуры дадалі, што ўсе гэтыя прапановы яшчэ будуць абмяркоўвацца, іх прыняцце будзе залежаць ад пазіцый усіх зацікаўленых бакоў.

БЕЛТА

За суткі ў Беларусі зарэгістраваны 888 пацыентаў з COVID-19, выпісаны 742

Фота з архіва

За суткі ў Беларусі зарэгістраваны 888 пацыентаў з COVID-19, выпісаны 742. Аб гэтым БЕЛТА паведамілі ў прэс-службе Міністэрства аховы здароўя.

Усяго з пачатку пандэміі ў Беларусі былі зарэгістраваны 345 998 чалавек са станоўчым тэстам на COVID-19. Выздаравелі 336 227 пацыентаў, у якіх раней быў пацверджаны дыягназ COVID-19.

За ўвесь перыяд распаўсюджвання інфекцыі на тэрыторыі краіны памерлі 2443 пацыенты з выяўленым каранавірусам.

За мінулыя суткі выканана 9307 тэстаў. Усяго ў краіне іх праведзена 5 685 902.

БЕЛТА

“Спадзяюся, што гэта будзе добрым сігналам” – Лукашэнка пра сустрэчу з дэпутатам Вярхоўнай рады Украіны Яўгенам Шаўчэнкам

Яўген Шаўчэнка і Аляксандр Лукашэнка

Прэзідэнт Беларусі Аляксандр Лукашэнка разлічвае, што яго сустрэча з народным дэпутатам Вярхоўнай рады Украіны Яўгенам Шаўчэнкам стане добрым сігналам і будзе садзейнічаць развіццю адносін дзвюх краін, перадае карэспандэнт БЕЛТА.

“Прыемна з вамі сустрэцца. Аказваецца, ёсць яшчэ ва Украіне людзі, якія паважаюць Беларусь”, – прывітаў кіраўнік дзяржавы госця ў Палацы Незалежнасці.

“Не проста паважаюць, а любяць і цэняць. Для мяне вельмі вялікі гонар з вамі пазнаёміцца, я даўно марыў. Праўда, шчыра”, – адказаў Яўген Шаўчэнка.

Аляксандр Лукашэнка адзначыў, што для яго таксама важна гэта сустрэча. “Па-першае, нагода пагаварыць пра беларуска-ўкраінскія адносіны. Мы, напэўна, мала гаворым апошнім часам наогул на гэту тэму. А калі гаворым, то не заўсёды пазітыўна. Ведаю, што адбываецца на маёй роднай Украіне. Вы ведаеце маё стаўленне да Украіны – не толькі як Прэзідэнта, але і маё асабістае стаўленне. Таму вельмі важна гэта наша сустрэча як такі добры сігнал. Я спадзяюся, што гэта будзе добрым сігналам, зыходзячы з таго, што я ведаю пра вас і вашу пазіцыю наконт беларуска-ўкраінскіх адносін і наогул адносна Беларусі”, – сказаў Прэзідэнт.

Па-другое, кіраўнік дзяржавы разлічвае, што гэта сустрэча стане добрым пачаткам супрацоўніцтва сапраўдных патрыётаў Украіны з Беларуссю. “Мы ніколі нічога не ўтойвалі ад украінскіх нашых сяброў, утойваць не маем намеру і ў далейшым, тым больш ад нашых сяброў. Можа, я думаў, што іх (колькасць. – Заўвага БЕЛТА) зменшылася, але наўрад ці. Напэўна, проста пра іх менш гавораць і яны, магчыма, менш гавораць апошнім часам. Але не думаю, што ў нас там менш сяброў”, – заўважыў беларускі лідар.

БЕЛТА