У Беларусі ў 2020 годзе забяспечаны прырост узроўню даходаў насельніцтва – галоўнага індыкатара дабрабыту грамадзян. Аб гэтым заявіў намеснік прэм’ер-міністра Ігар Петрышэнка, выступаючы на пасяджэнні калегіі Міністэрства працы і сацыяльнай абароны, паведамілі БЕЛТА ў прэс-службе ўрада.

“У мінулым годзе ўстойліва павышалася заработная плата. Яе рэальны тэмп росту ў эканоміцы ў цэлым склаў 108,2 працэнта, па бюджэтнай сферы – больш за 113 працэнтаў. Выкананы галоўны мэтавы арыенцір – суадносіны зарплаты бюджэтнікаў і сярэдняй па краіне перавысілі 80 працэнтаў. Практычна поўнасцю вырашылі задачу па зніжэнні колькасці арганізацый з зарплатай меншай за Br500”, – падкрэсліў віцэ-прэм’ер. У той жа час статыстыка за студзень гэтага года сведчыць, што яшчэ даволі значная колькасць арганізацый знаходзяцца ў памежным стане і не маюць устойлівага перавышэння над зададзеным параметрам. Пастаўленую задачу па такіх арганізацыях неабходна выканаць да канца першага квартала.

Паводле слоў Ігара Петрышэнкі, на бягучы год задача больш амбіцыйная – падцягнуць зарплату ў арганізацыях, у якіх яна не перавышае сярэднюю па галіне. Віцэ-прэм’ер падкрэсліў, што кожная з іх павінна знаходзіцца ў пастаянным полі зроку міністэрства, неабходны аналіз дастатковасці і рэзультатыўнасці мер, якія прымаюцца на месцах. “Што датычыцца бюджэтнай сферы, то тут патрэбна дакладная стратэгія, як будзем рухацца далей. Мэтавыя задачы вызначаны, у тым ліку па асобных катэгорыях работнiкаў – педагогах, урачах і іншых. Цалкам відавочна, што тут давядзецца задзейнічаць усе магчымыя крыніцы і рэзервы – ад развіцця пазабюджэтнай дзейнасці да аптымізацыі сеткі і пераходу на нарматыўна-мэтавы прынцып бюджэтавання галін. Пры гэтым Міністэрству працы і сацыяльнай абароны неабходна больш прадметна займацца пытаннямі заработнай платы ва ўласнай галіне. Гэта ваш кадравы патэнцыял”, – звярнуў увагу Ігар Петрышэнка.

Ён таксама падкрэсліў, што апошнім часам пытанні занятасці насельніцтва набылі асаблівую значнасць з улікам бягучай сітуацыі на рынку працы. Месяц таму пытанні занятасці праз прызму дэкрэта нумар 3 былі тэмай прадметнага разгляду на пасяджэнні Прэзідыума Савета Міністраў. “Створаны дэкрэтам механізм з’яўляецца важным інструментам сацыяльнай палітыкі і павінен быць у поўнай меры выкарыстаны для вырашэння пастаўленых задач. Неабходна далейшае развіццё механізмаў стымулявання занятасці асобных катэгорый насельніцтва”, – адзначыў віцэ-прэм’ер.

Ключавым напрамкам работы Міністэрства працы і сацыяльнай абароны ў бягучай пяцігодцы застаецца выпрацоўка эфектыўных мер дзяржаўнай падтрымкі сем’яў, якія выхоўваюць дзяцей, забеспячэнне стабільнасці дэмаграфічнага развіцця. “Так, вельмі шмат зроблена за папярэднія гады. Разам з тым вастрыня дэмаграфічных праблем патрабуе прыняцця далейшых рэзультатыўных крокаў. На Усебеларускім народным сходзе Прэзідэнт даручыў распрацаваць праграму “Шматдзетная Беларусь”, напоўніць яе дзейснымі мерамі, здольнымі даць дадатковы дэмаграфічны эфект”, – канстатаваў Ігар Петрышэнка.

Важнейшым інструментам падтрымкі грамадзян, якія апынуліся ў цяжкай жыццёвай сітуацыі, аб’ектыўна маючых нізкі ўзровень даходаў, з’яўляецца сістэма дзяржаўнай адраснай сацыяльнай дапамогі. “Толькі за 2020 год яе атрымальнікамі сталі звыш 305 тыс. чалавек, што на 3,5 працэнта больш у параўнанні з 2019 годам. Сума прадстаўленай дапамогі павялічылася на 19 працэнтаў і склала Br112,4 млн. Тут таксама ёсць нямала рэзерваў для павышэння эфектыўнасці, спрашчэння адміністрацыйных працэдур”, – падкрэсліў віцэ-прэм’ер.

Акрамя таго, Ігар Петрышэнка звярнуў увагу, што на парадку дня застаюцца пытанні далейшага ўдасканалення пенсійнай сістэмы. “Кожны чацвёрты жыхар нашай краіны сёння з’яўляецца атрымальнікам пенсійных выплат. Расходы Фонду сацыяльнай абароны насельніцтва на названыя мэты перасягнулі ў 2020 годзе Br13,3 млрд. Гэта больш за 9 працэнтаў ВУП. У няпростых эканамічных умовах не дапушчана зніжэння пакупной здольнасці пенсій. Іх рост у рэальным выражэнні забяспечаны на ўзроўні 4 працэнтаў”, – адзначыў ён.

Віцэ-прэм’ер закрануў і блок пытанняў, якія датычацца сацыяльнай дапамогі і сацыяльнага абслугоўвання насельніцтва. “Актуальнасць і значнасць гэтых пытанняў для эканомікі і грамадства будуць толькі нарастаць. Да 2030 года кожны пяты жыхар нашай краіны перасягне 65-гадовы рубеж. Таму ўжо сёння мы павінны бачыць абсалютна выразныя перспектывы вырашэння не толькі бягучых праблем, але і задач сярэдне- і доўгатэрміновага характару. Патрабуе глыбокага змястоўнага напаўнення работа па рэалізацыі зацверджанай урадам нацыянальнай стратэгіі “Актыўнае даўгалецце – 2030″. Гэта тэма павінна праходзіць чырвонай ніткай праз усе праводзімыя ў краіне мерапрыемствы як на рэспубліканскім, так і на мясцовым узроўні”, – заявіў ён.

Таксама Ігар Петрышэнка выказаў меркаванне, што сферай асаблівай увагі міністэрства і мясцовых органаў улады павінна заставацца сацыяльная падтрымка асоб з інваліднасцю, іх комплекснай рэабілітацыі і інтэграцыі ў грамадства. “Вектар у гэтай рабоце павінен зрушвацца ад поўнага дзяржаўнага патэрналізму ў бок стварэння належных умоў для нармальнай жыццядзейнасці названай катэгорыі грамадзян. Неабходна актыўна вывучаць і ўкараняць існуючы перадавы вопыт, прымаць меры па пашырэнні магчымасцей для забеспячэння максімальнай занятасці людзей з інваліднасцю, што адпавядае іх інтарэсам і патрэбам грамадства, прадугледзець укараненне новых форм работы і падтрымкі канструктыўных ініцыятыў”, – рэзюмаваў намеснік прэм’ер-міністра.

БЕЛТА

Савет Міністраў зацвердзіў дзяржаўную праграму “Увекавечванне памяці аб загінулых пры абароне Айчыны” на 2021-2025 гады. Гэта прадугледжана пастановай урада ад 26 лютага 2021 года нумар 117, паведамляе БЕЛТА са спасылкай на Нацыянальны прававы інтэрнэт-партал.

Праграма распрацавана ў мэтах захавання памяці аб загінулых пры абароне Айчыны і ахвярах войнаў. “Рэалізацыя дзяржпраграмы будзе садзейнічаць захаванню ваенна-гістарычнай спадчыны беларускага народа, грамадзянска-патрыятычнаму выхаванню, выкананню міжнародных пагадненняў у ваенна-мемарыяльнай сферы”, – гаворыцца ў дакуменце.

Распрацаваны комплекс мерапрыемстваў. У іх ліку добраўпарадкаванне, утрыманне, бягучы і капітальны рамонт мемарыяльных комплексаў, мясцін баявой славы, воінскіх пахаванняў і пахаванняў ахвяр войнаў, пошукавая работа для ўсталявання даных аб загінулых вязнях лагера і іх захаванне ў электроннай “Кнізе Памяці ахвяр лагера смерці “Трасцянец”, палявыя пошукавыя работы. Таксама ў планах суправаджэнне аўтаматызаванага банка даных “Кніга Памяці Рэспублікі Беларусь” з выкарыстаннем інтэрнэту.

На фінансаванне праграмы неабходна больш за Br9,2 млн.

Пастанова ўступае ў сілу пасля афіцыйнага апублікавання і распаўсюджвае сваё дзеянне на адносіны, што ўзніклі з 1 студзеня 2021 года.

БЕЛТА

Акцыя “Дзень посткросера” пройдзе 1 сакавіка ва ўсіх аддзяленнях паштовай сувязі Беларусі, паведамілі БЕЛТА ў прэс-службе РУП “Белпошта”.

У гэты дзень пры адпраўцы 10 і больш міжнародных паштовых картак прадастаўляецца скідка 10 працэнтаў.

Посткросінг – гэта міжнародны анлайн-праект, дзе незнаёмыя людзі з розных куткоў планеты абменьваюцца паштовымі карткамі і маркамі. “Сюрпрыз у вашай паштовай скрынцы” – асноўны дэвіз посткросінгу.

Каб далучыцца да праекта, неабходна зарэгістравацца на сайце www.postcrossing.com, пазначыўшы свой дамашні адрас і кароткую інфармацыю пра сябе (захапленні, пажаданні, якія паштоўкі падабаюцца, што хочацца даведацца аб іншай краіне), і адправіць паштоўкі пяці жыхарам розных краін, адрасы якіх прапануе сістэма сайта. Праз некаторы час у адказ прыйдуць паштоўкі з усяго свету.

БЕЛТА

Трэба сур’ёзна выбудаваць, а дзе-нідзе і перабудаваць работу Савета бяспекі Беларусі. Аб гэтым Кіраўнік дзяржавы Аляксандр Лукашэнка заявіў сёння на сустрэчы з дзяржаўным сакратаром Савета бяспекі Аляксандрам Вальфовічам, перадае карэспандэнт БЕЛТА.

Паводле слоў Прэзідэнта, абапірацца ў гэтай рабоце трэба ў тым ліку на вопыт работы аналагічных структур у блізкіх краінах. Напрыклад, Расіі і Казахстане.

БЕЛТА

Туман і галалёдзіца на асобных участках дарог чакаюцца ў Беларусі 25 лютага, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

У чацвер будзе воблачна з праясненнямі. Уначы прагназуецца без істотных ападкаў, раніцай і ўдзень у асобных раёнах пройдзе невялікі дождж. У начны і ранішні час месцамі магчымы туман, слабы галалёд. Вецер заходні 4-9 м/с, удзень па поўначы парывы да 12 м/с.

Тэмпература паветра ўначы будзе вагацца ад мінус 2 да плюс 4 градусаў. Удзень чакаецца 3-9 градусаў цяпла, у паўднёва-заходніх раёнах – плюс 10-13 градусаў.

БЕЛТА

Віцэ-прэм’ер адзначыў, што максімальна выразныя задачы для сістэмы аховы здароўя пастаўлены кіраўніком дзяржавы на VI Усебеларускім народным сходзе. У прыватнасці, трэба рэалізаваць маштабны праект “Здаровая нацыя”, у аснове якога чатыры асноўныя стаўпы: мабільная медыцына, крокавая даступнасць, клапатлівая паліклініка, высокатэхналагічная медыцына ў рэгіёнах. “У гэтай рабоце ёсць добры зачын, але ўсе вы павінны дакладна разумець усю напружанасць пастаўленых перад галіной задач, адказнасць кожнага канкрэтнага выканаўцы”, – сказаў Ігар Петрышэнка.

Міністэрствам не пазней за I паўгоддзе бягучага года павінны быць распрацаваны і зацверджаны максімальна канкрэтныя планы-заданні, тэрміны іх рэалізацыі і індыкатары, даведзеныя да кожнага раёна. Намеснік прэм’ер-міністра падкрэсліў, што кожны галоўны ўрач ЦРБ і старшыня райвыканкама павінны разумець, што яны абавязаны забяспечыць і за што будуць адказваць: пачынаючы ад ўкамплектаванасці і замацавання кадраў, заканчваючы машынамі хуткай дапамогі, медыцынскім абсталяваннем і лічбавізацыяй.

У бліжэйшы час павінна быць атрымана адчувальная аддача ад развіцця міжрэгіянальных і міжраённых цэнтраў спецыялізаванай медыцынскай дапамогі, адзначыў Ігар Петрышэнка. Паводле яго слоў, цэнтры для рэгіёнаў павінны стаць апорнымі, забяспечваць рэальную даступнасць для насельніцтва асноўных відаў такой дапамогі. З іх развіццём трэба ўвязваць і планы перааснашчэння арганізацый аховы здароўя.

Неабходна паскорыць распрацоўку інфармацыйнай платформы, якая дае магчымасць у аўтаматычным рэжыме кантраляваць самастойныя (дэцэнтралізаваныя) закупкі арганізацыямі аховы здароўя медыцынскай тэхнікі і вырабаў медыцынскага прызначэння. З гэтым непасрэдна звязаны пытанні эфектыўнасці расходавання бюджэтных сродкаў. “Ніякіх пасрэднікаў і “прыкормленых”, як сказаў кіраўнік дзяржавы, тут быць не павінна. Ніякага перавышэння цэн пры пастаўках у межах краіны аднатыпных тавараў”, – звярнуў увагу віцэ-прэм’ер.

Далейшага ўдасканалення патрабуе работа міністэрства і абласных упраўленняў па кантролі за функцыянаваннем і своечасовым рамонтам высокатэхналагічнага абсталявання. “Пакуль належнага выніку тут таксама не дасягнута”, – заўважыў ён.

Намеснік прэм’ер-міністра звярнуў увагу на важнасць падрыхтоўкі і ўкамплектаванасці кадрамі. “Думаю, што наспела пытанне аб змяненні падыходаў да нарміравання штатнай колькасці медыцынскіх работнікаў, увязцы колькасці персаналу з аб’ёмам выкананых работ і, безумоўна, з адпаведным узроўнем аплаты працы”, – сказаў ён. Міністэрству аховы здароўя трэба глыбока прапрацаваць гэту тэму і выпрацаваць канкрэтныя прапановы. Аснову гэтаму павінен у тым ліку закласці рэалізуемы міністэрствам пілотны праект па пераводзе фінансавання галіны на прынцыпы клініка-затратных груп.

Акрамя таго, Ігар Петрышэнка звярнуў увагу на важнасць пастаяннай адкрытай зваротнай сувязі з насельніцтвам, спажыўцамі медыцынскіх паслуг. Ён лічыць, што мэтазгодна правесці мэтавыя рэгіянальныя сацыялагічныя апытанні і даследаванні, размясціць адпаведныя апытальнікі і анкеты на сайце Міністэрства аховы здароўя. І ў цэлым неабходна перагледзець структуру і напаўненне сайтаў (ад міністэрства да кожнай ЦРБ), адпаведных раздзелаў у сацсетках, зрабіўшы іх на больш высокім прафесійным узроўні, у першую чаргу інфарматыўнымі і зручнымі для карыстальнікаў.

БЕЛТА

Кіраўнік дзяржавы адзначыў, што ўжо шосты раз у суверэннай гісторыі краіны звяртаюцца непасрэдна да народа, каб разам абмеркаваць і прыняць кансалідаванае рашэнне па далейшым развіцці нашай краіны і грамадства.

8 лютага, Мінск /Кар. БЕЛТА/. Расія і Беларусь з сённяшняга дня аднаўляюць чыгуначныя зносіны, перадае ТАСС.

Поезд нумар 1/2 Масква – Мінск фарміравання Беларускай чыгункі ў панядзелак, 8 лютага, адправіцца ў першы рэйс з Мінска пасля працяглага перапынку. З Масквы ён адправіцца ў зваротным напрамку ў аўторак, 9 лютага, далей будзе курсіраваць праз дзень.

Згодна з графікам, з Мінска поезд будзе выходзіць у 22.10 (супадае з маскоўскім) і прыбываць на Беларускі вакзал Масквы ў 8.13 наступнага дня. У зваротны рэйс з Масквы ён будзе адпраўляцца ў 22.13 і прыбываць у Мінск на наступны дзень у 7.26. Па шляху руху па тэрыторыі РФ поезд для пасадкі і высадкі пасажыраў будзе рабіць прыпынкі ў Смаленску і Вязьме.

Плануецца, што з 9 лютага ў Мінску прыпынак для пасадкі і высадкі пасажыраў будзе рабіць поезд нумар 30/29 “Янтар” Калінінград – Масква фарміравання Федэральнай пасажырскай кампаніі (даччынае таварыства РЧ) з магчымасцю праезду ў ім грамадзян РФ і Беларусі на ўчастку Масква – Мінск – Масква. Поезд курсіруе кожны дзень, цяпер па тэрыторыі рэспублікі ён ідзе транзітам.

Аб аднаўленні руху іншых міжнародных пасажырскіх паяздоў паміж Расіяй і Беларуссю будзе аб’яўлена дадаткова, паведамілі ў РЧ.

Калегія Еўразійскай эканамічнай камісіі раней прыняла метадычныя рэкамендацыі па прафілактыцы распаўсюджвання каранавіруснай інфекцыі ў паяздах далёкага накіравання. Асобы, якія прыбываюць у краіны ЕАЭС, павінны мець адмоўны тэст на COVID-19, выдадзены за тры дні да перасячэння граніцы, за выключэннем дзяцей да пяці гадоў. Калі ў пасажыра, які мае даведку аб адмоўным тэсце, на момант прыбыцця да граніцы будзе зафіксавана павышаная тэмпература, ён размяшчаецца на ізаляцыю ў інфекцыйны стацыянар.

Пры гэтым пасажыры, якія не будуць мець даведак аб адсутнасці COVID-19 пры ўездзе на тэрыторыю краіны, павінны быць ізаляваны ў каранцінным стацыянары на тэрмін да двух сутак для правядзення тэсціравання. Пасля атрымання рэзультатаў асобы са станоўчым рэзультатам пераводзяцца ў інфекцыйны стацыянар для лячэння, асобы з адмоўным рэзультатам ізалююцца дома на працягу 12 сутак. У выпадку адсутнасці ўмоў для ізаляцыі дома рэкамендуецца ізаляцыя ў спецыяльна вызначаных для гэтага памяшканнях, вынікае з рэкамендацый.

БЕЛТА