Беларуская рэспубліканская піянерская арганізацыя 20 кастрычніка дае старт новаму анлайн-праекту “Пазнай Беларусь”, паведаміла карэспандэнту БЕЛТА старшыня Цэнтральнага савета БРПА Аляксандра Ганчарова.

“Удзельнікамі праекта стануць піянеры і акцябраты ва ўзросце 7-14 гадоў. Юнакоў і дзяўчат чакае 6 месяцаў паглыблення ў гісторыю, традыцыі, прыроду Беларусі і многае іншае. Яны паспрабуюць прыгатаваць стравы беларускай нацыянальнай кухні, пашыць сваімі рукамі нацыянальную цацку, падзеляцца незвычайнымі традыцыямі роднага краю”, – расказала Аляксандра Ганчарова.

Выканаўшы заданні, піянеры павінны будуць выкладваць фота і відэасправаздачы на сваіх старонках у сацыяльных сетках з адзіным хэштэгам праекта #познайБеларусь. “Пераможцаў і прызёраў конкурсу чакаюць незвычайныя прызы і дыпломы ад Беларускай рэспубліканскай піянерскай арганізацыі”, – дадала старшыня ЦС БРПА.

Больш падрабязна азнаёміцца з умовамі ўдзелу ў праекце і прайсці рэгістрацыю можна на сайце арганізацыі.

БЕЛТА

Уборка грэчкі і проса завяршаецца ў Беларусі, паведамляе БЕЛТА са спасылкай на аператыўную інфармацыю Міністэрства сельскай гаспадаркі і харчавання.

Паводле даных на 6 кастрычніка, грэчка ў Беларусі ўбрана з 23,8 тыс. га (95,3 працэнта запланаванай плошчы). Ураджайнасць гэтай культуры склала 12,8 ц/га, намалочана 30,5 тыс. т. Што датычыцца проса, яго ўбралі з 95,4 працэнта плошчаў (7,15 тыс. га), намалочана 15,9 тыс. т пры сярэдняй ураджайнасці 22,2 ц/га. Яравы рапс убраны з 99,6 працэнта плошчаў (36,2 тыс. га). Усяго намалочана 827,9 тыс. т рапсу (з улікам азімага) пры сярэдняй ураджайнасці 14,7 ц/га.

Кукурузу ўбралі з 671 тыс. га, што складае 55,1 працэнта запланаванай плошчы. На сілас і зялёны корм убрана 649,6 тыс. га (64,6 працэнта плана), сабрана 15,652 млн т зялёнай масы пры ўраджайнасці 241 ц/га. Уборка кукурузы на зерне таксама прадаўжаецца: работы праведзены на 21,5 тыс. га (10,05 працэнта плана), намалочана 130,7 тыс. т.

Усяго па краіне намалочана 8,186 млн т збожжа пры сярэдняй ураджайнасці 37 ц/га (у 2019 годзе ўраджайнасць на аналагічную дату складала 32,3 ц/га). У Мінскай вобласці сабралі 2 млн т збожжа, Гродзенскай – больш за 1,5 млн т, Брэсцкай – звыш 1,3 млн т, Магілёўскай – больш за 1,1 млн т, Віцебскай – звыш 1 млн т, Гомельскай – больш за 900 тыс. т.

Абгортванне стужак лёну праведзена на 38,5 тыс. га (80,9 працэнта да выцерабленага). Ільнотраста паднята з 44,3 тыс. га (93,2 працэнта ад плана), нарыхтавана 138,2 тыс. т пры сярэдняй ураджайнасці 36,8 ц/га.

Акрамя таго, у Беларусі нарыхтавана 859,4 тыс. т сена (85,1 працэнта ад плана), 13,323 млн т сенажу (105,7 працэнта) і 13,455 млн т сіласу (70,2 працэнта). Усяго ў бягучым годзе плануецца атрымаць 9,3 млн т кармавых адзінак травяных кармоў, прычым найбольшая доля прыпадзе на Мінскую і Брэсцкую вобласці. Да гэтага часу нарыхтавана 83,8 працэнта ад плана.

БЕЛТА

Прэзідэнт Беларусі Аляксандр Лукашэнка прыняў сёння з дакладам старшыню Дзяржаўнага мытнага камітэта Юрыя Сянько, перадае карэспандэнт БЕЛТА.

“Перш за ўсё я хацеў бы літаральна ў двух словах пачуць пра вынікі работы вашага ведамства, каб у разрэзе праз мытныя службы ацаніць сітуацыю ў нашай эканоміцы. Вы разумееце, што мытня – гэта ў большай ступені, чым іншыя ведамствы, люстэрка нашай эканомікі. Якія ў нас ёсць вузкія месцы? Як мы развіваемся ў гэтых складаных умовах сусветнага крызісу, звязанага перш за ўсё з пандэміяй? І што, з вашага пункту гледжання, трэба зрабіць у бліжэйшы час, каб утрымаць эканоміку ў гэтым годзе?” – абазначыў некалькі пытанняў Аляксандр Лукашэнка.

Прэзідэнт таксама пацікавіўся сітуацыяй на граніцах з Літвой, Латвіяй, Польшчай і Украінай. “Асабліва што датычыцца дзвюх балтыйскіх дзяржаў – Літвы і Латвіі. Як вы мне дакладваеце, амаль 40 працэнтаў грузавікоў у гэтым годзе ідуць з Літвы і Латвіі. Гэта велізарны аб’ём. Калі мы возьмемся за гэты паток, то лагістычныя пункты Літвы недаатрымаюць недзе чвэрць”, – адзначыў кіраўнік дзяржавы.

Аляксандр Лукашэнка нагадаў, што Беларусь і Расія цяпер абмяркоўваюць пераарыентацыю беларускіх грузаў (нафтапрадуктаў, калійных угнаенняў і іншых тавараў) з балтыйскага напрамку на порт Усць-Луга. “Як Мытны камітэт бачыць пераарыентацыю гэтых грузаў? І ў развіццё гэтага – нашы лагістычныя цэнтры. У нас створаны магутныя лагістычныя цэнтры. Вельмі многія паслугі, у тым ліку для нашых суб’ектаў гаспадарання і для суб’ектаў краін ЕАЭС, аказваюцца ў той жа Літве. Але, наколькі я інфармаваны, гэтыя паслугі мы можам аказаць гэтым перавозчыкам у Беларусі. Як вы бачыце вырашэнне гэтай праблемы?” – спытаў ён.

Юрый Сянько пачаў свой даклад са статыстыкі па знешнім гандлі. Паводле яго слоў, за студзень-жнівень беларускую мытную граніцу з краінамі Балтыі, Польшчы і Украіны перасек 71 млн т тавараў. Гэта на 15 працэнтаў ніжэй, чым за аналагічны перыяд мінулага года. “На гэта паўплывала ў тым ліку Расія, якая на 30 працэнтаў знізіла аб’ём нафтапрадуктаў, якія рэалізаваліся для краін Заходняй Еўропы. Наша змяншэнне экспарту і імпарту адбылося толькі на 10 працэнтаў, – адзначыў старшыня ДМК. – У асноўным гэта чыгуначны транспарт. На аўтамабільныя пункты пропуску сітуацыя на граніцы практычна не паўплывала, толькі ў пачатку пандэміі, калі было агульнае зніжэнне пакупной актыўнасці насельніцтва як у Еўропе, так і ў краінах ЕАЭС. Але ўжо ўсе патокі аднаўляюцца”.

Аб укладзе ў рэспубліканскі бюджэт

За студзень-верасень у рэспубліканскі бюджэт паступіла Br6,1 млрд плацяжоў, кантралюемых Дзяржаўным мытным камітэтам. Пералічаная сума амаль на 8 працэнтаў меншая ў параўнанні з аналагічным перыядам мінулага года. Адна з прычын, як растлумачылі ў ДМК, – праводзімы Расіяй падатковы манеўр. Асноўнае змяншэнне плацяжоў адбылося за кошт вывазных мытных пошлін. Калі не браць у разлік гэту пазіцыю, то ў цэлым плацяжы, што паступілі, павялічыліся на Br230 млн, або на 5,3 працэнта.

Аб праваахоўнай дзейнасці

У гэтым годзе мытныя органы ўжо выявілі 210 злачынстваў. У іх ліку 79 фактаў незаконнага перамяшчэння наркотыкаў праз граніцу. Пры гэтым было канфіскавана 95 кг наркотыкаў і 19 тыс. таблетак, якія змяшчаюць наркатычныя і псіхатропныя рэчывы. Акрамя таго, выяўлены 73 злачынствы ў эканамічнай сферы, урон па іх склаў амаль Br13,5 млн.

Узбуджаны тры крымінальныя справы па фактах незаконнага перамяшчэння праз мытную граніцу зброі, боепрыпасаў і аб’ектаў экспартнага кантролю (частак магазінаў да агнястрэльнай, паляўнічай і іншых відаў зброі).

Мытныя органы таксама выявілі 11 злачынстваў, звязаных з незаконным перамяшчэннем праз граніцу буйных наяўных сродкаў. Агульны кошт канфіскаванай валюты па адміністрацыйных правапарушэннях і злачынствах склаў Br2,7 млн.

Аб развіцці мытнай інфраструктуры

У гэтым годзе асноўная частка сродкаў накіравана на рэканструкцыю двух аб’ектаў – пунктаў пропуску “Верхні Церабежаў” і “Урбаны”. Па стане на верасень, яны гатовы на 70 працэнтаў і 92,6 працэнта адпаведна.

Як адзначылі ў Дзяржаўным мытным камітэце, мадэрнізацыя гэтых пунктаў пропуску дасць магчымасць павялічыць іх прапускную здольнасць на 1375 аўтамабіляў у суткі.

БЕЛТА

“Апошнім часам мы бачым, што рост захваральнасці прадаўжаецца. І ўжо цяпер можна гаварыць, што гэта другая хваля. Мы назіраем аналагічную карціну ў іншых краінах Еўропы і свету. Гэта звязана з нармальным ходам захворвання, з характарыстыкамі віруса”, – сказаў Аляксандр Пацэеў.

“У нас адпрацавана ўся сістэма, усе алгарытмы аказання меддапамогі, усе клінічныя пратаколы. Мы стварылі сістэму, якая паказала сваю эфектыўнасць. У нас ёсць выразныя раздзяленні патокаў пацыентаў па цяжкасці захворвання. Ложкавага фонду дастаткова. Дастатковыя магутнасці анестэзіёлага-рэанімацыйнай службы, ШВЛ. За апошнія некалькі месяцаў значна палепшылася сітуацыя па забеспячэнні кіслароднымі пунктамі. Сістэма аховы здароўя ў цэлым гатова да работы. Прафесіяналы ведаюць пратаколы, у іх ёсць вопыт работы”, – сказаў Аляксандр Пацэеў.

Акрамя таго, сістэма аховы здароўя забяспечана лякарствамі для аказання меддапамогі. Для супрацоўнікаў ёсць дастаткова сродкаў індывідуальнай аховы. “З пункту гледжання прафілактыкі неабходна тое, пра што мы гаварылі і раней, гэта сацыяльнае дыстанцыраванне і нашэнне сродкаў індывідуальнай аховы”, – дадаў начальнік галоўнага ўпраўлення.

БЕЛТА

Тэлефонная размова Прэзідэнта Беларусі Аляксандра Лукашэнкі з Прэзідэнтам Расіі Уладзімірам Пуціным адбылася сёння. У час размовы кіраўнікі дзяржаў абмеркавалі самы шырокі спектр тэм, паведамілі БЕЛТА ў прэс-службе беларускага лідара.

У полі зроку прэзідэнтаў быў шэраг міжнародных праблем. У тым ліку сітуацыя ў Нагорным Карабаху.

Ва ўзаемасувязі з існуючымі еўрапейскімі праблемамі Аляксандр Лукашэнка і Уладзімір Пуцін абмеркавалі сітуацыю ў Беларусі і Расіі. І абмяняліся падрабязнай інфармацыяй пра абстаноўку ўнутры краіны.

Значная ўвага ў час размовы была ўдзелена сітуацыі з распаўсюджваннем COVID-19, выказана заклапочанасць ростам захваральнасці на гэту інфекцыю.

Прэзідэнты абмеркавалі далейшыя дзеянні па нармалізацыі транспартных зносін – авіяцыйных, чыгуначных і аўтамабільных – паміж дзвюма краінамі.

Таксама вялікую ўвагу Аляксандр Лукашэнка і Уладзімір Пуцін удзялілі аналізу праведзеных сумесных ваенных вучэнняў “Славянскае братэрства – 2020”.

Акрамя таго, кіраўнікі дзяржаў падрабязна абмеркавалі вынікі VII Форуму рэгіёнаў Беларусі і Расіі, падкрэслілі важнейшую ролю ў двухбаковых адносінах прамых кантактаў на ўзроўні кіраўнікоў рэгіёнаў і прадпрыемстваў. Было выказана перакананне, што пазітыўныя вынікі гэтай сумеснай работы павінны ў першую чаргу адчуць на сабе грамадзяне дзвюх краін.

БЕЛТА

Зарэгістраваны 78 631 чалавек са станоўчым тэстам на COVID-19. Усяго праведзена 1 858 732 тэсты.

За ўвесь перыяд распаўсюджвання інфекцыі на тэрыторыі краіны памерлі 833 пацыенты з шэрагам хранічных захворванняў з выяўленай каранавіруснай інфекцыяй.

БЕЛТА